(1) Por la trasformaziun de bosć te d’atres sorts de coltivaziun o te d’atres formes de nuzaziun dl terac te raiuns cun lian d’adoranza ôl ester l’autorisaziun dl comitê forestal dla Provinzia, sön la basa dl arat dl diretur dla Repartiziun provinziala Bosć, cun prescriziuns eventuales da pert dl comitê por schivé i dagns aladô dl articul 3. Chësta autorisaziun de trasformaziun é na condiziun por l’inserimënt tl plann urbanistich comunal nü o reelaborè, sciöche inće tla varianta de chësc.
(2) Le comitê forestal dla Provinzia po dè l’autorisaziun aladô dl coma 1 a condiziun ch’al vëgnes remboschè o recostituì le bosch sön n’atra spersa adatada poscibilmënter tl medemo raiun idrogeografich.
(3) Le prozedimënt por dè fora les autorisaziuns vëgn regolè tl regolamënt d’esecuziun de chësta lege.
(4) Toć de grunt che confinëia cun bosć che gnô da vedlamënter incà adorà sciöche pra, pastöres, ćiamps da ordöra o vigna po gnì condüć zoruch a süa adoranza originara inće sce le bosch natural mët man da crësce bel plan do, tan inant ch’al ne s’à nia ćiamò formè n bosch intier; chësc po ma gnì a s’al dè sce le comitê forestal dla Provinzia dà so bëgnstè positif y sce les condiziuns ch’al dà dant, sc’al é debojëgn, vëgn osservades.
(5) Cuntra i provedimënć dl comitê forestal dla Provinzia pol gnì fat recurs ala Junta provinziala anter trënta dis dala recioiüda dla notificaziun respetiva.
(6) Chi che trasformëia bosch zënza autorisaziun o ne se tëgn nia ales prescriziuns dl comitê forestal dla Provinzia é sotmetü a na straufunga aministrativa de 7 euro por vigni meter cuadrat intier o na süa fraziun de spersa trasformada; la straufunga minima é te vigni caje de 62 euro.2)
(7) 3)
Les somes é gnüdes mudades insciö dal art. 1, coma 37, dl D.P.P. di 19 de lugio 2006, nr. 34.
L’art. 5, coma 7 é gnü abroghè dal art. 5, coma 1, dla l.p. di 12 de dezëmber dl 2011, n. 14.