3) Decret dl Presidënt dla Republica dl 31 de agost 1972, n. 6701)
Apurvazion dl test unich dla leges costituzioneles che reverda l statut speziel per l Trentin-Südtirol

(1) I zitadins de rujeneda tudëscia dla Provinzia de Bulsan à la rejon de se nuzé de si rujeneda ti raporc cun i ufizies giudizieres y cun i organns y i ufizies dl’aministrazion publica che à si sënta tla Provinzia o che à cumpetënza regiunela, sciche nce cun i cunzesciuneres de servijes de nteres publich tla Provinzia.

(2) Tla sentedes di organns colegiai dla Region, dla Provinzia de Bulsan y di ënc locai te chësta Provinzia possel unì adurvà la rujeneda taliana o la rujeneda tudëscia.

(3) I ufizies, i organns y i cunzesciuneres nunziei tl coma 1 se nuza tla curespundënza y ti raporc a usc dla rujeneda de chël che damanda, y respuend tla rujeneda te chëla che la ates ie unides nviedes via da n auter organn o ufize; canche la curespundënza vën nvieda via d'ufize, vëniela scrita tla rujeneda jagheda dl zitadin destinater.

(4) Ora che per i caji udui danora espressivamënter – y ora che per la regulazion cun normes de atuazion di caji dl’adurvanza de tramedoi rujenedes adum tla ates destinedes ala cumenanza di zitadins, tla ates ndividueles destinedes a n’adurnaza publica y tla ates destinedes a deplù ufizies – ie ti autri caji recunesciuda l’adurvanza spartida de l'una o de l’autra rujeneda. L resta mpe l’adurvanza dla sëula rujeneda taliana ti urdinamënc dl militer.